रत्नागिरी:- जिल्हा शासकीय रुग्णालय, जिल्हा विधी सेवा प्राधिकरण आणि इंडियन मेडिकल असोसिएशन यांच्या संयुक्त विद्यमाने राष्ट्रीय युवा दिन 2025 निमित्त भव्य आरोग्य जनजागृती नाट्यस्पर्धेचे आयोजन रत्नागिरी शहरातील वि. दा. सावरकर नाट्यगृहात करण्यात आले. “उठा, जागृत व्हा आणि तुमच्याकडे असलेली शक्ती ओळखा” या प्रेरणादायी थीमवर आधारित या स्पर्धेत श्री. भागोजीशेठ कीर विधी महाविद्यालय, रत्नागिरीच्या संघाने प्रथम क्रमांक पटकावला.
स्पर्धेतील मान्यवर उपस्थिती
या कार्यक्रमास प्रमुख जिल्हा व सत्र न्यायाधीश श्री. सुनील गोसावी, जिल्हा पोलिस अधीक्षक श्री. धनंजय कुलकर्णी, जिल्हा शल्य चिकित्सक डॉ. भास्कर जगताप, प्रादेशिक मनोरुग्णालयाच्या अधीक्षक डॉ. संघमित्रा फुले आणि इंडियन मेडिकल असोसिएशनचे पदाधिकारी यांसह अनेक मान्यवरांनी हजेरी लावली.
स्पर्धेचा उत्साह
जिल्ह्यातील विविध महाविद्यालये, प्राथमिक आरोग्य केंद्रांचे संघ आणि शासकीय कर्मचाऱ्यांच्या 17 संघांनी या नाट्यस्पर्धेत उत्साहाने सहभाग घेतला. प्रत्येक संघाने आरोग्य जनजागृतीवर आधारित उत्कृष्ट सादरीकरणे सादर केली.
विजेत्या संघाची घोषणा आणि पारितोषिक वितरण
विजेतेपद पटकावलेल्या श्री. भागोजीशेठ कीर विधी महाविद्यालय, रत्नागिरीच्या संघात साहिल गोरे, अथर्व विचारे, देवेंद्र मोहिते, अथर्व बाक्कर, विक्रांत घाग, साईराज कोलते, रिया भोसले, नूपुर पाथरे आणि राधा टीकेकर यांचा समावेश होता. विजेत्या संघाला डॉ. अलिमिया परकार यांच्या हस्ते रोख रक्कम रुपये 8000, प्रमाणपत्र व सन्मानचषक प्रदान करण्यात आले.
संघाचे मार्गदर्शन आणि प्रोत्साहन
श्री. भागोजीशेठ कीर विधी महाविद्यालयाचे प्राचार्य डॉ. आशिष बर्वे यांनी संघाला खंबीर साथ व विशेष प्रोत्साहन दिले, तर नाटकाचे दिग्दर्शन प्राध्यापिका अॅड. गौरी शेवडे देसाई यांनी केले.
आरोग्य जनजागृतीसाठी विविध संस्थांचा सहभाग आणि नाट्यस्पर्धेतील विद्यार्थ्यांचा जोश हा प्रेरणादायी ठरला. हा उपक्रम आरोग्य क्षेत्रातील जनजागृतीसाठी अत्यंत उपयुक्त ठरला असून, युवकांमध्ये नवनवीन विचारांना चालना देणारा ठरला.
मुख्य संपादक – हृषिकेश सावंत