रत्नागिरी, २८ जानेवारी: महाराष्ट्र अंधश्रद्धा निर्मूलन समितीची (अंनिस) राज्य कार्यकारणी बैठक येत्या शनिवार, १ फेब्रुवारी आणि रविवार, २ फेब्रुवारी रोजी रत्नागिरीतील ओंकार मंगल कार्यालय, गांजुर्डा, शिरगाव येथे होणार आहे. या बैठकीत मागील सहा महिन्यांच्या कामाचा आढावा घेऊन पुढील सहा महिन्यांचे कार्य नियोजन आखले जाणार आहे.
या दोन दिवसीय बैठकीत अंनिसच्या विविध विभागांवर चर्चा करण्यात येणार आहे. यामध्ये अंधश्रद्धा निर्मूलन वार्तापत्र विभाग, अंनिस प्रकाशन विभाग, प्रशिक्षण विभाग, सोशल मीडिया विभाग, महिला विभाग, आंतरजातीय विवाह सहाय्य विभाग, मानसिक आरोग्य विभाग, बुवाबाजी संघर्ष विभाग आणि अन्य विभागांचा समावेश आहे.
बैठकीसाठी राज्यभरातून सुमारे १५० पदाधिकारी आणि कार्यकर्ते उपस्थित राहणार असून, प्रमुख उपस्थितीमध्ये डॉ. हमीद दाभोलकर, दिपक गिरमे, मिलिंद देशमुख, अण्णा कडलास्कर, नंदिनी जाधव, रामभाऊ डोंगरे, सम्राट हटकर, प्रवीण देशमुख, गणेश चिंचोले यांचा समावेश आहे.
बैठकीचे उद्घाटन शनिवार, १ फेब्रुवारी रोजी सकाळी १० वाजता समाजवादी कार्यकर्ते आणि नवनिर्माण शिक्षण संस्थेचे चेअरमन अभिजित हेगशेट्ये यांच्या हस्ते होईल. क्रेडाई रत्नागिरीचे अध्यक्ष नित्यानंद भुते उद्घाटन समारंभाला प्रमुख पाहुणे म्हणून उपस्थित राहतील.
पहिल्या दिवशी दुपारी १२ ते सायं. ७ या कालावधीत अंनिसच्या मागील सहा महिन्यांच्या राज्य व जिल्हा स्तरावरील कामाचा अहवाल सादर केला जाईल. याच दिवशी संध्याकाळी ८ वाजता रत्नागिरीतील प्रसिद्ध जादूगार विनयराज यांच्या जादू प्रयोगांचे सादरीकरण होईल, ज्यामध्ये बुवाबाजी भांडाफोडीवर विशेष चर्चा होणार आहे.
बैठकीचा समारोप रविवारी, २ फेब्रुवारी रोजी दुपारी १ वाजता होईल. समारोपप्रसंगी रत्नागिरी आकाशवाणीचे कार्यक्रम अधिकारी सुहास विद्वांस आणि शासकीय फिशरीज कॉलेजचे प्रा. डॉ. केतन चौधरी उपस्थित राहतील. समारोपाच्या वेळी महाराष्ट्र अंनिसच्या वतीने पाच महत्त्वपूर्ण ठराव मंजूर करण्यात येणार आहेत.
या संपूर्ण कार्यक्रमाचे संयोजन रत्नागिरी अंधश्रद्धा निर्मूलन समितीचे कार्यकर्ते विनोद वायंगणकर, राधा वणजू, जयश्री बर्वे, वल्लभ वणजू, अनिश पटवर्धन आणि मधुसूदन तावडे यांनी केले आहे.
ही बैठक अंनिसच्या पुढील कार्याची दिशा ठरवण्यासाठी आणि अंधश्रद्धा निर्मूलनाच्या चळवळीसाठी अत्यंत महत्त्वाची ठरणार आहे.