चिपळूण:- कोकण विभागात चिपळूण नगर परिषदेने माझी वसुंधरा अभियान ४.० मध्ये प्रथम क्रमांक मिळवून ७५ लाख रुपयांचे पारितोषिक प्राप्त केले आहे. महाराष्ट्र शासनाच्या पर्यावरण व वातावरणीय बदल विभागामार्फत नागरी आणि ग्रामीण क्षेत्रांसाठी राबविण्यात येणारा अनोखा एकात्मिक असा उपक्रम आहे. यामध्ये नैसर्गिक परिसंस्थांचे जतन व संरक्षण करण्यासाठीच्या विविध उपायांची अंमलबजावणी करणे आणि वातावरणीय बदलाच्या अनुषंगाने राबविण्यात येणाऱ्या पर्यावरणपूरक कृती उपक्रमांवर नागरिकांच्या सहभागास प्रोत्साहित करणे, याबाबी समाविष्ट केल्या आहेत.
या अभियानाची रचना कार्बन सीक्वेस्ट्रेशन, हरित वायुंचे उत्सर्जन कमी करणे आणि नागरिकांमध्ये शाश्वत जीवनशैलीचा प्रचार करणे या वातावरणीय बदलाच्या तीन महत्वाच्या बाबींवर लक्ष केंद्रीत करण्यासाठी करण्यात आली आहे. माझी वसुंधरा अभियान निसर्गाच्या पाच घटकांना (भूमी, वायु, जल, अग्नी आणि आकाश) संबोधित करून आणि नागरिकांच्या सहभागाला प्रोत्साहन देऊन माझी वसुंधरा अभियान शाश्वत विकास उद्दीष्टये साध्य करण्यासाठी योगदान देते. पृथ्वी, वायू, जल, अग्नी, आणि आकाश या निसर्गाशी संबंधित पंचतत्वांवर आधारित माझी वसुंधरा अभियान हे राज्यातील स्थानिक स्वराज्य संस्थांमध्ये दिनांक ०२ ऑक्टोबर २०२० पासून राबविण्यास सुरूवात झाली. माझी वसुंधरा अभियान ४.० हे राज्यातील स्थानिक स्वराज्य संस्थांमध्ये दिनांक ०१ एप्रिल २०२३ ते दिनांक ३१ मे २०२४ या कालावधीत डेस्कटॉप मुल्यमापनासाठी ८१००, फिल्ड मुल्यमापनासाठी ३३०० असे एकूण गुण११४०० सहित राबविण्यात आले. माझी वसुंधरा अभियान ४.० मध्ये राज्यातील ४१४ नागरी स्थानिक संस्था व २२,२१८ ग्रामपंचायती अशा एकूण २२,६३२ स्थानिक संस्थांनी सहभाग घेतला होता. सदर अभियानाचे डेस्कटॉप मुल्यमापन दिनांक १५ जून २०२४ रोजी तर फिल्ड मुल्यमापन दिनांक ०८ ऑगस्ट २०२४ रोजी करण्यात आले.
वर्षभरातील कामगिरी –आय.ई.सी. उपक्रम , ई-प्लेज – ५६८१ सहित सतत टॉप १० मध्ये चिपळूण नगर परिषद काम करित असताना प्रशासक तथा मुख्याधिकारी श्री. विशाल भोसले यांच्या मार्गदर्शनाखाली प्रशासकिय अधिकारी श्री. मंगेश पेढांबकर, कार्यालय अधिक्षक श्री. अनंत मोरे, उद्यान विभाग प्रमुख श्री. प्रसाद साडविलकर, हॉर्टिकल्चरिस्ट सुरज सकपाळ, लिपिक कम डेटा ऑपरेटर सेजल महाडिक, फिल्डवर काम करणारे कुशल गमरे, लहू बने, विजय लाखन, आदित्य कांबळे, स्वप्निल साळवी, राकेश जंगम व आरोग्य विभाग प्रमुख श्री. वैभव निवाते, आरोग्य निरिक्षक श्री. महेश जाधव आणि आरोग्य विभाग कर्मचारी व नगर परिषदेचे अधिकारी व कर्मचारी यांनी माझी वसुंधरा अभियान ४.० मध्ये उत्तम कामगिरी बजावून ५० हजार ते ०१ लक्ष लोकसंख्या नगर परिषद व नगरपंचायत या गटामध्ये चिपळूण नगर परिषदेचा कोकण विभागात प्रथम क्रमांक मिळवून ७५ लक्ष रूपयांचे बक्षिस प्राप्त केले आहे. मा. मुख्याधिकारी विशाल भोसले यांनी यामध्ये उद्यान विभाग प्रमुख प्रसाद उर्फ बापू साडविलकर यांचे व सर्व टीमचे तसेच आरोग्य विभागाच्या टीमचे व सर्व अधिकारी व कर्मचाऱ्यांचे विशेष कौतुक केले तसेच सर्व नागरिकांकडून मा. श्री विशाल भोसले व अधिकारी तसेच कर्मचारी यांचे अभिनंदन होत आहे.