सर्वसमावेशक सामाजिक कार्याचा धडाका सुरूच; सर्व स्तरांतून होतोय कौतुकाचा वर्षाव!
गव्हाणे (लांजा):- योगेश रामचंद्र कांबळे हे एका सामान्य घरातून येतात व आपल्या सामाजिक कार्याच्या जोरावर त्यांनी लांजा तालुक्यातील गव्हाणे जिल्हा परिषद गटात आज आपले एक स्वतंत्र अस्तित्व निर्माण केले आहे. गोरगरीब जनतेची रोजच्या आयुष्याशी निगडित कामे, सरकार दरबारी असणारी प्रलंबित कामे, लोकांच्या अडी-अडचणींना धावून जाणे, वैद्यकीय मदत मिळवून देणे यामुळे आज दशक्रोशी मधील सामाजिक-राजकीय विश्वात त्यांची आवर्जून चर्चा असते. प्रत्येक राजकीय पक्ष, संघटना त्यांना आपल्याकडे ओढण्याचे अपार प्रयत्न करत असतात. सरकारी योजना, नियम, कायदे, इत्यादी बाबींची त्यांना उत्कृष्ट समज व विशेष अभ्यास असल्याने सरकारी योजना तळागाळातील नांगरिकांपर्यंत पोहोचवणे, त्याचा लाभ नागरिकांना होतो आहे की नाही यांचा व्यक्तिगत पातळीवर सरकारी कार्यालयांमध्ये पाठपुरावा करणे व ती योजना राबविण्यास प्रशासनास सहकार्य करणे अशा पद्धतीचे प्रभावी सामाजिक कार्य श्री. कांबळे करत असतात.
ग्रामीण भागातील शेतकरी व कष्टकरी वर्ग हा बऱ्याच अंशी शिक्षित नसतो, त्याला रोजच्या जीवनात वावरताना अनेक समस्यांना व अन्यायाला सामोरे जावे लागत असते. निष्पाप लोकांवर अन्याय होईल तेथे पहिले हजर राहून त्यांची सोडवणूक केली पाहिजे या भावनेतून योगेश कांबळे यांनी आजतागायत पोलीस स्टेशन पासून अनेक व्यक्तिगत समस्यांच्या वेळी योग्य ती मदत करून अनेक गरीब व्यक्तींची सेवा केली आहे. योगेश कांबळे हे आगवे ग्रामपंचायतीचे सदस्य असून शिवसेनेचे उप-विभाग प्रमुख देखील आहेत. पक्षाच्या पदाचे काम हे शेतकरी, कष्टकरी, ज्येष्ठ नागरिक, गोरगरीब व वंचित जनतेच्या भल्यासाठी वापरायचे या तत्त्वावर ते वाटचाल करीत असतात. काही दिवसांपूर्वी गव्हाणे जि. प गटातील दुर्गम भाग अनेक दिवस विजेपासून वंचित असताना त्यांनी सदर प्रश्न महावितरण कडे योग्य तो पाठपुरावा करत मार्गी लावला. गव्हाणे गटातील युवक-युवती, विद्यार्थी-विद्यार्थिनी यांना शिक्षणासाठी व्यक्तिगत पातळीवर स्वखर्चाने मदत, आरोग्य सुविधा मजबूत व्हावी यासाठीची त्यांची धडपड व पाठपुरावा तसेच ग्रामस्थांच्या व्यक्तिगत कामांसाठीची त्यांच्या सततच्या तालुक्याच्या ठिकाणी म्हणजेच लांजा व रत्नागिरी या जिल्हा ठिकाणच्या सरकारी कार्यालयांमधील फेऱ्या व धडपड यातून त्यांची जनते प्रतीची बांधिलकी दिसून येते. अजातशत्रु व्यक्तिमत्त्व असलेल्या श्री. योगेश कांबळे यांच्या सर्वसमावेशक कार्यामुळे त्यांचे गव्हाणे जिल्हा परिषद गटातील नागरिकांकडून कौतुकाचा वर्षाव होत आहे.